«Altsgeymer hastalığınıñ alâmetleri bar». Pavlo Grıbnıñ babası – oğlunıñ sağlığı aqqında (video)

Rusiyede tutulıp mektep talebesini terakt azırlamağa qızıştırğanında qabaatlanıp mahküm etilgen ukrainalı Pavlo Grıb acele ameliyatqa muhtac, sağlıq vaziyeti pek fenalaştı. Pavlonıñ babası daa evel bildirgenine köre, sağlıq vaziyeti yaramay olıp qala – baş ağrısı, umumiy taqatsızlıq bitmey, amma kerekli tibbiy yardım kösterilmey. 2017 senesi avgust ayında Pavlo Grıb Beyazrusiyeniñ Gömel şeerinde ğayıp oldı, daa soñra onı Rusiyeniñ Krasnodarındaki SİZOda tapqanlar. Onı terrorizm maddesine istinaden cinayet işlegeninde qabaatlaylar. Ukraina Baş prokuraturası ukrainalınıñ ğayıp olmasınen bağlı cinaiy dava açtı.